பாரினில் தோன்றிய ஏனை உயிரின் வேறானோம்
சீரிய அறிவுடன் சிந்தித் தறிதல் பெற்றுள்ளோம்
தாரினில் நெருங்கிய வாழைப் பழம்போல் சேர்ந்திருப்போம் 01
சேர்ந்தா ரோடு உண்மை யாக பழகிடுவோம்
நேர்த்தி யாக உண்மை பேசி உயர்ந்திடுவோம்
கூர்சிந் தனையை நல்ல செயற்கு செலவழிப்போம்
ஏரை உழுது பயிர்கள் செய்து வளம்பெறுவோம் 02
வளம்தரும் கல்வி சிறப்புடன் கற்று பயன்பெறுவோம்
குளங்களைத் தோண்டி வரும்புனல் காத்து பருகிடுவோம்
களையென தீய ஒழுக்கமும் நீக்கி சிறந்திடுவோம்
இளமையில் நல்ல உடல்வளம் பெற்று மகிழ்ந்திடுவோம் 03
மகிழ்ச்சி பொங்கும் வாழ்க்கை வாழ முயன்றிடுவோம்
நிகழ்ந்த வற்றை மறக்க நாளும் பழகிடுவோம்
முகத்திற் கெதிரே புகழ்வார் விட்டு ஒதுங்கிடுவோம்
அகத்தை பார்த்து பழகும் நண்பர் ஏற்றிடுவோம் 04
ஏற்றிவிட்ட ஏணிப் படியை மறவா திருப்போம்
போற்றுகின்ற உறவை விட்டு விலகா திருப்போம்
தூற்றுகின்ற மனித ரோடு சோரா திருப்போம்
நாற்றுபோல சேர்ந்தா ரிடத்தும் மகிழ்ந்து இருப்போம் 05
தருகிற எண்ணம் நாளும் வளர்க்கப் பழகிவிடு
உரிமைகள் இருந்தும் கிடைக்கா விட்டால் விட்டுவிடு
சரியென நினைத்தால் பயந்து விடாமல் செய்துவிடு 06
செய்யும் தொழிலே தெய்வம் என்று மதித்துச்செய்
பொய்யும் ஏய்ப்பும் நீக்கி வாழ பழகிக்கொள்
மயக்கம் கொடுக்கும் வார்த்தை தெரிந்து ஒதுங்கிக்கொள்
நியாயச் செயலை கொள்கை யாக கடைபிடித்துவாழ் 07
ஏழ்மை உன்னை சூழ்ந்த போதும் நேர்மைகொள்
வீழ்த்த போது குழந்தை போல அழதுவிடாதே
வாழ்ந்த மனிதர் பாதை அறிந்து வழிநடத்து 08
வள்ளுவர் குறள்வழி வாழ்வை நடத்தி சிறந்திடுவோம்
வள்ளலார் நெறியினை பொன்னாய் மதித்து செயல்படுவோம்
பிள்ளைகள் மனதினை நன்றாய் புரித்து வளர்த்திடுவோம்
பிள்ளைகள் கல்வியை அச்ச மின்றி கற்கசெய்வோம் 09
கல்வி ஒழுக்கம் நம்மிரு கண்கள் காத்திடணும்
சொல்லும் சொற்கள் நல்லவை யாக இருந்திடணும்
வல்லவ ரோடு நட்பென பழகி கற்றிடணும்
நல்லோர் செயலை நலமுடன் செய்து புகழ்பெறணும் 10
