அன்னை தந்தை என்பவர்கள்
நம்மைப் படைத்த தெய்வங்கள்
தன்னை உருக்கி பிள்ளைகளை
காக்கும் இயல்பு கொண்டவர்கள்
உன்போல் அவரை எண்ணிடணும்
உரிமை கொண்டு போற்றிடணும்
சின்னச் சின்ன வலிகூட
இல்லா தவரைக் காத்திடணும் 01
அன்னையும் தந்தையும் நம்மைப் படைத்த (உருவாக்கிய) தெய்வங்கள். பிள்ளைகளை காத்து வளர்ப்பதற்காக தன்னையே உருக்கிக் கொண்டவர்கள். உன்னைப் போலவே அவரையும் நினைத்தல் வேண்டும். வயதான காலத்தில் அவர்கள் மீது உரிமைகொண்டு, சின்ன வலிகூட தெரியாமல் அவர்களைக் காத்திட வேண்டும்.
அன்னை யாரென் றறியாத
உயிர்கள் கூட இருப்பதுண்டு
அன்னை இன்றி உயிரினங்கள்
தானாய் பிறக்க வழியில்லை
மனித உயிரும் பிறஉயிரும்
மண்ணில் தோன்றி யமாமுனியும்
அன்னைப் பாதம் தொழவேண்டும்
அவளின் அருளைப் பெறவேண்டும். 02
இந்த நில உலகில், அன்னை யார்? என்று அறியாதவர்கள் கூட இருப்பதுண்டு. ஆனால், அன்னை இல்லாமல் யாரும் தானாய் பிறந்திருக்க மாட்டார்கள். மனிதர்களோ? பிற உயிரினங்களோ? முனிவர்களாய்ச் சென்றவர்களோ? யாராக இருந்தாலும் அன்னையின் பாதத்தைத் தொழவேண்டும். அன்னையின் அன்பைப் பெறவேண்டும்.
தந்தை உழைப்பிற் கீடாக
எதையும் சொல்ல முடியாது
தந்தை என்போர் பிள்ளைக்காய்
மலையைக் கூட தாங்கிடுவார்
சிந்தை முழுதும் பிள்ளைகளின்
வளர்ச்சி நோக்கி பயணிப்பார்
தந்தை தோற்றம் முள்பழமே
பழமாய் உள்ளம் இருந்திடுமே! 03
தந்தையின் உழைப்புக்கு ஈடாக வேறு எதையும் சொல்ல முடியாது. தந்தை என்பவர் பிள்ளைகளுக்காக மலை போன்ற வலியைக் கூட தாங்கிக் கொள்வார். அவரின் சிந்தனைகள் முழுவதும் பிள்ளைகளின் வளர்ச்சி நோக்கியே இருக்கும். கோபத்தைக் காட்டுபவராகவும் பார்ப்பதற்கும் பலாப் பழம்போன்று கரடுமுரடாக இருந்தாலும் அவரின் உள்ளம் பலா பழம் போன்று இனிமையானது.
தாயால் வந்த நம்மொழியை
தரணி முழுதும் பரப்பிடுவோம்
வேயா குடிசை பலன்தருமோ
பேசி அதனை வளர்த்திடுவோம்
தேயும் நிலவும் ஒருநாளில்
முழுமை யாக வளர்ந்துவிடும்
ஓயா நமது செய்கையினால்
மொழியும் வளர்ந்து சிறந்திடுமே 04
தாய் தந்த நம் மொழியை உலகம் முழுதும் பரவச் செய்வோம். வீட்டின் மேல் கூரை வேயப்படவில்லை என்றால் அந்தக் குடிசையால் எந்தப் பயனும் இல்லை. அதுபோல பிறரிடம் நம்மொழியைப் பேசாமல் மொழியும் வளர்வதில்லை. தேய்கின்ற நிலவு கூட ஒருநாள் முழுமை அடையும். அதுபோல மொழி வளர்வதற்கான நம்முடைய ஓயாத செய்கையினால் நமது மொழியும் வளர்ந்து செழிப்படையும்.
கண்ணில் தெரியா மின்சாரம்
கையை வைத்தால் தாக்கிவிடும்
கண்ணில் கல்லாய் தோன்றுகின்ற
கடவுள் சிலையும் அதுவாகும்
கண்ணால் காதால் வாயாலே
கண்டு கேட்டுப் புகழ்வோமே
எண்ணம் செயலாய் நாமிருந்து
தொழுது தினமும் பணிவோமே 05
மின்சாரம் கண்களுக்குத் தெரியாது என்றாலும் தொட்டவுடன் தாக்கத்தை ஏற்படுத்தும். கோவில் கருவறையில் உள்ள கடவுள் சிலையும் அப்படித்தான் பார்ப்பதற்குக் கல்லாக தெரிந்தாலும் அதன் சக்தி அளவற்றது. அத்தெய்வத்தை கண்ணால் காண்போம். காதால் கேட்போம். வாயால் புகழ்வோம். சிந்தனையும் செயலையும் இறைவன்பால் வைத்து தினமும் பணிந்து வணங்கிடுவோம்.
வெளிச்சம் இல்லா கருவிழிகள்
பொருளைக் காண உதவிடுமோ?
விளையா நிலத்தில் விதைத்தூவ
விளைச்சல் தந்து செழித்திடுமோ?
பிள்ளை மீது அக்கரைகள்
கொள்ளா பெற்றோர் இருக்கையிலே
பிள்ளை வாழ்வு சிறந்திடுமோ?
மதிப்பு செல்வம் வந்திடுமோ? 06
வெளிச்சம் இல்லாத இடத்தில் கருவிழிகளால் பொருட்களைக் காண இயலாது. விளையாத நிலத்தில் நல்ல விதைகளையே விதைத்தாலும் விளைச்சல் தந்து செழிக்காது. அதுபோல பிள்ளைகள் மீது பெற்றவருக்கு அக்கரை இல்லாத வரையில் அவர் பிள்ளைகளின் வாழ்க்கை சிறப்பத்தில்லை. மதிப்பு மரியாதை செல்வம் எதுவும் கிடைப்பத்தில்லை.
காற்று வீசும் திசைநோக்கி
மெல்ல மெல்ல பறந்தாலும்
காற்றின் வேகம் மிகக்கடந்து
பயணம் எளிதாய் அமைந்திடுமே.
காற்றை எதிர்த்து கடும்பயணம்
செய்தால் வெற்றி கிடைக்காது.
காற்றாய் இருப்போர் பணிவுகொண்டு
வெற்றிக் கனியைப் பறித்திடுவீர் 07
காற்று வீசும் திசையில் கடினமில்லாமல் பறந்தாலும் காற்றைவிட இருமடங்கு வேகத்தில் சென்று இலக்கை அடையலாம். காற்றை எதிர்த்து கடுமையாகப் போராடினாலும் வெற்றி நமக்குக் கிடைக்காது. காற்றுபோல இருக்கும் அதிகாரத்தில் இருப்பவரிடம் பணிந்து தன் செயல்களை முடித்துக் கொள்ள வேண்டும்.
கண்கள் இலாத எறும்புஅதன்
கால மெல்லாம் உழைக்கிறது
கண்கள் இருந்தும் நாமெல்லாம்
சோம்ப லோடு வாழ்கின்றோம்
கண்க ளோடு ஐம்பொறிகள்
அழகாய் படைத்தான் நம்மிறைவன்
கண்டு கேட்டு வாழ்வுதனை
களிப்பாய் வாழ்ந்து கழிப்போமே 08
கண்ணில்லாத எறும்புகள் அதன் வாழ்நாள் முழுவதும் உழைத்து வாழ்கிறது. கண்கள் இருந்தும் நாம் எல்லாம் சோம்பலோடு வாழ்கின்றோம். இறைவன் நமக்கு, மெய், வாய், கண், மூக்கு, செவி ஆகிய ஐந்து பொறிகளையும் குறையில்லாமல் படைத்திருக்கிறான். தொடுதல், சுவைத்தல், பார்த்தல், நுகர்தல், கேட்டல் என வாழ்க்கையை இன்பமாய் வாழ்ந்து வாழ்நாளைக் கழிப்போம்.
வேப்பம் பூவின் தேன்துளிகள்
கண்க ளுக்குத் தெரியாது;
வேப்பம் பூவாய் அறிவுரைகள்
ஏற்றால் துன்பம் இருக்காது;
பாம்பின் நஞ்சை இறக்கிவிடும்
நோயைப் போக்கி துடிப்பூட்டும்
வேம்பை நட்டு புவியெங்கும்
வெப்பம் தணித்து வாழ்வோமே 09
வேப்பம் பூவில் உள்ள தேன் துளிகள் கண்களுக்குத் தெரியாது. அதுபோல, பெரியவர்கள் சொல்லும் அறிவுரைகள் கசப்பாக இருந்தாலும் அதனை ஏற்றுக் கொண்டால் துன்பம் இருக்காது. வேப்பமரத்தின் இலைகள், பாம்பின் நஞ்சினைக் கூடப் போக்கும் தன்மை உடையது. அந்த வேப்ப மரத்தினை பூமி எங்கும் நட்டு வெப்பத்தினைப் போக்கி வாழ்வோம்.
நட்பைப் புரிந்து கொண்டவர்க்கு
நாளும் குறைகள் கிடையாது
நட்பாய் பழகும் பகைவருக்கு
நட்பின் அருமை தெரியாது
நட்பே உலக மானிடரை
நயமாய் கட்டி ஒன்றிணைக்கும்
நட்பு கொள்ளா மனிதர்கள்
நிலத்தில் இருக்க வாய்ப்பில்லை. 10
நட்பினைப் புரிந்து கொண்டவர்களுக்கு எந்த நாளிலும் குறைகள் இருக்காது. நட்பு என்னும் பேரில் பழகும் பகைவருக்கு நட்பின் அருமை புரியாது. உலகில் உள்ள மனிதர்கள் அனைவரையும் ஒன்றாக இணைக்கும் கயிறு நட்பு. எந்த மனிதனும் நட்பு கொள்ளாமல் வாழமுடியாது.
சின்னச் சின்ன ஆசைகளை
குறைத்து வாழ்வில் முன்னேறு
தன்னை உயர்த்த வேண்டுமெனில்
திறமை முழுதும் வெளிக்காட்டு
தனிமை விரும்பிப் போகாமல்
உறவில் மூழ்கி துணைதேடு
உன்னும் சோறு எதுவென்று
அறிந்து உண்டால் நலம்தருமே 11
அவசியம் இல்லாத சின்னச் சின்ன ஆசைகளைக் குறைத்துக் கொண்டு வாழ்க்கையில் முன்னேற வேண்டும். தன்னை உயர்த்திக் கொள்ள வேண்டும் என்றால், உன் திறமையை முழுமையாகக் காட்டவேண்டும். தனிமையை விரும்பிச் செல்லாமல் உறவுகளின் துணையோடு இருக்க வேண்டும். உண்ணும் உணவு எது என்று அறிந்து நல்ல உணவை உண்ண வேண்டும்.
நகரும் உயிர்கள் யாவையுமே
விரும்பி கூடி தனதினத்தை
தகுந்த முறையில் பாதுகாத்து
கருவை உயிராய் ஈன்றெடுக்கும்
நகரா உயிராய் இருப்பவைகள்
பூத்து ஈர்த்து விதையாக்கி
நகரும் ஒன்றின் வழியாக
விதைத்து விருத்தி செய்கிறதே. 12
ஓரிடத்தில் இருந்து இன்னொரு இடத்திற்கு நகர்ந்து செல்லும் உயிரினங்கள், தான் விரும்பிய இணையோடு இணைந்து (கலவி கொண்டு) தன்னுடைய இனத்தை தகுந்த முறையில் பாதுகாத்து கருக்கொண்ட உயிரை பெற்றெடுக்கும். நகர முடியாமல் இருக்கும் புல், பூண்டு, மரம், செடி, கொடிகள் பூக்களைப் பூத்து அதன் மூலமாக வண்டு முதலான பூச்சி இனங்களை ஈர்த்து மகரந்தச் சேர்க்கை செய்து, காய்த்து கனிந்து அதன்மூலம் விதைகளை நகர்ந்து செல்லுகின்ற ஒன்றின் மூலம் விதைகளைப் பரவச் செய்து தன்னுடைய இனத்தை விருத்தி செய்கின்றன.
அன்பி ருக்கும் இடத்தினிலே
உள்ளம் கொண்டு சேர்க்கின்றோம்
அன்பாய் நாமும் இருந்திடவே
யாரும் எண்ணம் கொண்டதில்லை
அன்பு ஒன்றே நோய்தீர்க்கும்
அன்பு ஒன்றே உயிர்வளர்க்கும்
அன்பு ஒன்றே பலம்சேர்க்கும்
அன்பாய் இருக்கப் பழகிடுவோம் 13
அன்பு யாரிடத்தில் இருக்கிறதோ அவரிடத்தில் தன்னுடைய உள்ளத்தைக் கொண்டு சேர்க்கின்றோம். ஆனால், நாம் யாவரிடமும் அன்பாய் இருக்க நினைப்பத்தில்லை. அன்பு ஒன்றே நம்முடைய உள்ளம் மற்றும் உடல் நோயைத் தீர்த்து உயிரை வளர்க்கிறது. அன்பு ஒன்றே நமக்குப் பக்க பலமாக இருக்கிறது. எனவே அனைவரும் அன்பாய் இருக்க பழகிடுவோம்.
அன்பில் லாத குடும்பத்தில்
அமைதி என்றும் இருப்பதில்லை
அன்பைத் தேடி குழந்தைகளும்
ஆற்று நீராய் ஓடிடுமே
அன்பு ஒன்றே உறவுகளை
அணைத்து கட்டி ஒன்றினைக்கும்
அன்பாய் நாளும் பழகிடுவோம்
அருமை உணர்ந்து செயல்படுவோம் 14
அன்பு இல்லாத குடும்பத்தில் என்றுமே அமைதி இருப்பதில்லை. பள்ளம் நோக்கி ஓடும் ஆற்று நீர்போல குழந்தைகளும் அன்பு இருக்கும் இடம் தேடிச் சொல்லும். அன்பு மட்டுமே உறவுகளை ஒன்று சேர்த்து இணைத்து வைக்கும். அதனால் அன்பின் அருமையை உணர்ந்து அன்பாய் ஒவ்வொரு நாளும் ஒவ்வொருவரிடமும் பழகிடுவோம்.
கடவுள் என்பது நம்பிக்கை
வாழ்வை சிறப்பாய் அமைத்துதரும்
கடவுள் என்பது கொழுகொம்பு
பற்றி வாழ்க்கை கடந்திடலாம்
கடவுள் என்பது போதிமரம்
வாழ்க்கை பாடம் கற்றுதரும்
கடவுள் என்பது கருணைஉள்ளம்
இரக்கம் கொண்டு காத்திடுமே 15
கடவுள் என்ற ஒன்று நாம் சிறப்பாக வாழ நம்பிக்கையைத் தருகிறது. கடவுள் ஒன்ற கொம்பைப் பிடித்துக் கொண்டு வாழ்க்கையை நல்ல முறையில் நடத்திச் சொல்லலாம். கடவுள் என்ற போதிமரம் நமக்கு நல்ல வாழ்க்கைப் பாடத்தைக் கற்றுத் தரும். கடவுளாகிய கருணை உள்ளம் நம்மீது இரக்கக் கொண்டு நம்மைக் காத்திடும்.
அடுக்களைப் பெண்கள் எல்லாம்
அரியணை ஏறி விட்டார்
துடிப்புடன் எல்லாத் திக்கும்
துணிந்தவர் வென்று வந்தார்
தடைகளும் அவர்க்கு இல்லை
தடுத்திட எவரு மில்லை
விடைகொடு வானம் ஏறி
விண்மலர் பறித்துச் சூட 16
சமையல் செய்து கொண்டிருந்த பெண்கள் இப்போது நல்ல உயர்ந்த பதவிகளை அடைந்துவிட்டனர். துடிப்புடனும் துணிவுடனும் அனைத்துத் துறைகளிலும் அனைத்து தடைகளையும் வெற்றி கொண்டு முன்னேறுகின்றனர். இனி தடைகள் என்பது அவர்களுக்கு இல்லை. தடுக்கவும் எவரும் இல்லை. அவர்கள் வான் அளவு சென்று விண் மலர்களைப் பறித்துச் சூடிட நாமும் பக்க துணையாக இருப்போம்.
பிறர்மனம் நோகா வண்ணம்
பேசிநீ பழக வேண்டும்
பிறர்செயல் குறைசொல் லாமல்
உன்செயல் திருத்த வேண்டும்
பெற்றவர் சொல்லைக் கோட்டு
பெருமைகள் சேர்க்க வேண்டும்
கற்றிடும் கல்வி உந்தன்
வாழ்வினை உயர்த்த வேண்டும் 17
பிறரின் மனம் புண்படாத வண்ணம் நம் பேச்சு அமைய வேண்டும். அவருடன் பழகிட வேண்டும். பிறரின் செயல்களைக் குறை சொல்லக் கூடாது. அதே நேரத்தின் நம்முடைய செயல்களை நாம் திருத்திக் கொள்ள வேண்டும். பெற்றவர்களின் சொல்லைக் கேட்க வேண்டும். அவர்களுக்கு பெருமைகள் தேடித் தரவேண்டும். நாம் கற்ற கல்வியால் நம்மை உயர்த்திக் கொள்ள வேண்டும்.
தலைமுடி நரைத்த பின்னும்
உடல்தசை இளைத்த பெண்ணும்
மலைபொருள் கரைந்த பின்னும்
உறவுகள் வெறுத்த பின்னும்
பலவித சோகம் வந்து
இருவரை துவைத்த பின்னும்
இளமையின் காதல் போல
முதுமையில் இருத்தல் நன்றே 18
இளமை முடிந்து தன் தலைமுடி நரைத்துவிட்டப் பின்பும் நம்முடைய உடல் தசைகள் சுருங்கிவிட்டப் பின்பும், தன்னிடம் இருந்த மலைபோன்ற செல்வங்கள் செலவழிந்த பின்பும் உறவுகள் அனைத்தும் நம்மை வெறுத்துவிட்ட பின்னும் பல்வேறு சோகங்கள் இருவரையும் துன்புறுத்திய போதும் கணவன் மனைவி இருவரும் இளமைக் காதல் போல இருந்தால் முதுமையிலும் இருப்பது நன்மைதரும்.
மரம்செடி கொடிகள் எல்லாம்
கனியுடன் விதையை வைத்து
பரம்பரைப் பெருக்கம் செய்ய
பிறர்உணக் கொடுத்து நிற்கும்
வரமென மரங்கள் நட்டால்
பெருமழை வாசல் தட்டும்
பரம்பரை வாழ்வ தற்கு
கடமையாய்ச் செய்து வாழ்வோம் 19
மரம் செடி கொடிகள் என அனைத்தும் கனியுடனே அதன் விதையை வைத்து தன்னுடைய பரம்பரையை பெருக்குவதற்காக பிற உயிரினங்கள் உண்ணக் கொடுக்கும். அதுபோல நம்முடைய பரம்பரை அல்லது தலைமுறையைக் காக்க வேண்டும் என்றால், நம்முடைய கடமையாக நினைத்து, மரங்களை நட்டு மழை பெய்விக்க வேண்டும்.
காலையில் எழுந்து கல்வியினை
கற்றிட நினைவில் நின்றிடுமே
மாலையில் ஓடி விளையாடு
உடல்மனம் உறுதி ஆக்கிடுமே
சாலையில் நடந்து செல்கையிலே
விதிமுறைப் படியே நடந்திடுவாய்
பாலென ஒழுக்க மாயிருந்து
யாவரும் போற்ற வாழ்ந்திடுவாய் 20
காலையில் எழுந்து கல்வி கற்றால் நினைவில் நிற்கும். மாலையில் ஓடி ஆடி விளையாடினால் உடலும் மனமும் உறுதியாகும். சாலையில் நடந்து செல்லும் போது சாலை விதிகளைக் கடைபிடித்து நடக்க வேண்டும். பிற நிறம் கலக்காத பால்போல தீய ஒழுக்கங்கள் துளி அளவும் கலக்காமல் யாவரும் போற்றும் வகையில் வாழவேண்டும்.
பண்டம் மாற்று முறையை
மீண்டும் கொண்டு வந்தால்
அண்டம் முழுதும் உள்ள
உழவன் கைகள் ஓங்கும்
மண்ணைக் கீரி விதைகள்
தூவும் அவனின் செயல்கள்
மண்ணின் உயிரைக் காத்தும்
உலகின் பசியைப் போக்கும் 21
முந்தைய காலத்துப் பண்டம் மாற்று முறையைத் தற்போது கொண்டு வந்தோமென்றால், உலகில் உள்ள அனைத்து உழவர்களின் கைகளும் உயரும். அவர்களின் மதிப்பும் உயரும். பூமியை உழுது விதை விதைக்கும் பயிர் செய்யும் உழவனின் செயல்களால் உலகத்தில் உள்ள அனைத்து உயிர்களும் பசி நீங்கி உயிர்வாழும்.
சோறு போடும் நிலத்தை விற்று
சோறு வாங்கி உண்கின்றீர்
சோறு போடும் மக்கட் கூட்டம்
உள்ளம் நொந்து வேகுதடா
சோறு தண்ணீர் வளம்கு றைய்ய
எதனை உண்டு வாழுவீரோ?
சோறு போடும் தொழிலைச் செய்து
நிலமை மீண்டும் மாற்றிடுவீர் 22
நமக்கு சோறுபோடும் விவசாய நிலத்தை விற்று, கடையில் சோறு வாங்கி உண்டுகொண்டிருக்கிறோம். சோறு போடும் விவசாயி, அவனுக்கு மதிப்பு இல்லாத காரணத்தால் மனம் நொந்து போகின்றான். உணவும் நீரும் பூமியில் குறைந்து போனபின்பு எதனை உண்டு வாழமுடியும். ஆகவே, விவசாயத்தை மீண்டும் செய்த உணவுப் பஞ்சம் இல்லா நிலைக்கு மாற்றிடுவோம்.
அன்னை தந்தை சொல்லை நீயும்
வேதம் என்று எண்ணிடு
அன்னை தந்தை வழிந டந்து
வாழ்வில் ஏற்றம் கண்டிடு
உன்னைக் காக்க உனைவ ளர்க்க
வாழ்வில் பாடு படுகிறார்
உனது வாழ்வில் உயர்வு காண
கடவுள் வேண்டி நிற்கிறார் 23
தாய், தந்தை சொல்லை வேதமாக நினைத்து மதித்தல் வேண்டும். அவர்கள் சொல்லும் வழியில் நடந்து வாழ்வில் முன்னேற வேண்டும். உன்னைக் காப்பதற்காகவும் வளர்ப்பதற்காகவுமே பாடுபட்டுக் கொண்டிருக்கிறார்கள். நீ வாழ்வில் முன்னேற வேண்டும் என்பதற்காக அவர்கள் கடவுளை வேண்டி வணங்குகிறார்கள்.
சுயந ளங்கள் சிறிது மின்றி
பெற்றெ டுத்து வளர்க்கிறார்
பயன்கொ டுக்கும் என்று சொல்லி
கல்வி கற்க வைக்கிறார்
தயவு இன்றி நீயும் வாழ
வழிகள் செய்து கொடுக்கிறார்
வயத டைந்த பின்னும் உனக்கு
தோள்கொ டுத்து நிற்கிறார் 24
குழந்தைகளே, உங்கள் பெற்றோர்கள் சுயநலம் ஏதும் இன்றி உங்களைப் பெற்று எடுத்து வளர்க்கின்றார்கள். உனக்குப் பயன் தரும் என்ற எண்ணத்தில் உன்னைக் கல்வி கற்க வைக்கிறார்கள். நீ யாருடைய தயவும் இல்லாமல் வாழ்வதற்கு வழிவகைகளையும் செய்கிறார்கள். அவர்கள் உழைக்கும் வயதைக் கடந்த பின்னும் உனக்குத் தோள் கொடுத்து உறுதுணையாக நிற்கிறார்கள்.
மா மா மா மா
சண்டை இல்லா உலகம் வேண்டும்
நட்பாய் உறவாய் பழக வேண்டும்
கொண்ட செயலில் உறுதி வேண்டும்
கொடுத்த வாக்கை காக்க வேண்டும்
பண்டை மரபு பேண வேண்டும்
பள்ளி சென்று கற்க வேண்டும்
பண்பா டறிந்து பழக வேண்டும்
பாவச் செயலை ஒதுக்க வேண்டும் 25
சண்டை, மோதல்கள் இல்லாத உலகம் வேண்டும். அனைவரும் நட்பாகவும் உறவாகவும் பழகவேண்டும். தாம் கொண்ட செயலில் உறுதியாக இருக்க வேண்டும். பிறருக்குக் கொடுத்த வாக்கை காப்பாற்ற வேண்டும். நம் முன்னோர்கள் கடைபிடித்து வந்த செயல்பாடுகளை நாமும் போற்றி அதன்வழி நடக்க வேண்டும். பள்ளிக்குச் சென்று கசடற கற்க வேண்டும். அனைவரிடமும் பண்புடனும் நாகரிகத்துடனும் பழகுதல் வேண்டும். பாவம் என்று தெரிந்த செயல்களை ஒதுக்கி செய்யாதிருக்க வேண்டும்.
பணமே குறிக்கோள் என்றி ருந்தால்
உறவும் நட்பும் பிரிந்து ஓடும்
பணமே வாழ்க்கை என்ப தல்ல
பணமும் வாழ்வின் அங்க மாகும்
பணத்தைத் தேடி ஓடி டாமல்
அதுஉன் கரத்தில் வரவே உழைப்பீர்
பணிவும் கனிவும் இருந்தால் போதும்
குறைவில் லாத வாழ்வு அமையும் 26
பணம் மட்டுமே குறிக்கோள் என்று வாழ்ந்தால் உறவினர்களும் நண்பர்களும் நம்மை விட்டு விரிந்து சென்று விடுவர். பணம் மட்டுமே வாழ்க்கை அல்ல. பணம் என்பது வாழவின் ஒரு பகுதி. அப்பணத்தைத் தேடித் தேடி ஓடி ஓயாமல், அந்தப் பணம் உன்னை வந்தடைய உழைத்து வாழ். பணியும் செயலும் இனிமையாக பேசும் தன்மையும் இருந்தால் போதும் எல்லா நிலைகளிலும் குறைவில்லாத வாழ்வு உனக்கு அமையும்.
பெண்கள் பணிந்தால் உறவு வளரும்
ஆண்கள் பணிந்தால் குடும்பம் உயரும்
கண்கள் இருண்டால் காட்சி மறையும்
கடமை மறந்தால் பலன்கள் குறையும்
எண்ணம் சிறந்தால் செல்வம் பெருகும்
வான வில்லாய் வாழ்க்கை ஒளிரும்
உண்மை என்றும் மறைவ தில்லை
உழைத்தால் வாழ்வு குறைவ தில்லை 27
பெண்களிடம் பணிவு இருந்தால் இருந்தால் உறவுகள் வளரும். ஆண்களிடத்தில் பணிவு இருந்தால் குடும்பம் வளர்ச்சி பெறும். கண்கள் ஒளி மங்கினால் காணும் காட்சிகள் தெரிவதில்லை. செய்யும் கடமைகளை நாம் மறந்தால் அதனால வரும் பலன்கள் குறையும். எண்ணம் நல்லதாய் இருந்தால் நம்மிடம் செல்வம் பெருகும். வானவில் போல வண்ணமயமான வாழ்க்கை அமையும். உண்மை ஒருபோதும் மறைந்துவிடுவதில்லை. உழைப்பவர் வாழ்வு ஒருபோதும் குறைவதில்லை.
கல்வி கற்றால் எல்லாம் மாறும்
என்று சொன்னார் பெரியோர்
கல்வி கற்றோம் பட்டம் பெற்றோம்
மாற்றம் நிகழ வில்லை.
கல்வி யாலே பட்டம் பெற்றோம்
அறிவு பெற்றோம் இல்லை
கல்வி அறத்தை ஊட்ட வேண்டும்
நடத்தை அதுபோல் வேண்டும் 28
கல்வி கற்றால் எல்லாம் மாறும் என்று பெயரியோர்கள் சொல்லியிருக்கிறார்கள். கல்வியும் கற்றோம் பட்டமும் பெற்றோம். எந்த மாற்றமும் நிகழவில்லை. ஏனெனில், கல்வி கற்று பட்டம் மட்டுமே பெற்றோம். கல்வி சார்ந்த அறிவு பெறவில்லை. கல்வி என்பது அறத்தை ஊட்டி வளர்க்க வேண்டும். நாமும் அந்த அறத்தின் வழி நடக்கவேண்டும்.
நாவின் ருசிக்காய் உண்ணும் உணவு
உடலை கெடுத்து வீணாக்கும்
தேவை மீறி இருக்கும் பணமோ
தனிமை யாக்கி விட்டுவிடும்
சேவை செய்யும் எண்ணம் இருந்தால்
தெய்வம் உன்னை பாராட்டும்
தேவை என்று உறவை சேர்த்தால்
இன்பம் உன்னை சீராட்டும் 29
நாவின் சுவைக்காக உண்ணும் உணவால் எந்தப் பயனும் இல்லை. அது உடலைக் கெடுத்து வீணாக்கும். தேவைக்கு அதிகமாக இருக்கும் பணம் நம்மை உறவுகளிடம் இருந்து தனிமைப்படுத்திவிடும். சேவை செய்யும் எண்ணம் இருந்தால் தெய்வமும் உன்னைப் பாராட்டும். உறவுகள் தேவை என்று அவர்களை உன்னோடு சேர்த்துக்கொண்டு வாழ்ந்தால் இன்பம் உன்னை வந்தடையும்.
பணத்தை நம்பி ஓடும் மனிதா
பரித வித்து நிற்பாயே
குணத்தைக் கொண்டு உலகில் வாழ்ந்தால்
குதூக லன்கள் பெறுவாயே
மணத்தால் வண்டு மலரை நாடி
பயணம் செய்து இன்புறுதே
எண்ணம் செயலும் நன்மை தந்தால்
எல்லாம் உன்னில் அடங்கிடுமே 30
பணம் பணம் என்று பணத்தை நம்பி ஓடுகின்ற மனிதனே, கவனமாய் இரு. இறுதியில் யாரும் இன்றித் துன்பப்படுவாய். உன்னிடம் குணம் இருந்தால் உலக வாழ்வு இன்பமயமாய் அமையும். மலரின் வாசத்தால் வண்டு மலரை நாடிச் சென்று இன்பம் காணும். எண்ணமும் செயலும் உலகிற்கு நல்லதைச் செய்தால் எல்லாம் உன்னிடம் வந்து சேரும்.
வாய்மொழி பேசும் மனிதஇனம்
கேட்டுத் தாகம் தணிக்க்கிறது
வாய்மொழி பேசா உயிரினங்கள்
தண்ணீர் தேடி பருகினவே
வாய்மொழி இல்லா மரம்செடிகள்
தாகம் தீர வழியுண்டோ?
தாய்மனம் கொண்டு அவைகாக்க
வாடும் முன்னே நீரிடுங்கள் 31
வாய்திறந்து பேசும் மனித இனம் தாகம் எடுத்தால் பலரிடம் கேட்டுத் தாகம் தீர்க்கும். வாய்ப் பேசமுடியாத விலங்குகள் எல்லாம் தண்ணீர் இருக்கும் இடம் தேடி தாகம் தீர்க்கும். வாயே இல்லாத மரம் செடிகொடிகள் யாரைக் கேட்டுத் தாகம் தீர்க்கும். ஆகவே மனிதர்களே தாய் மனதோடு அவற்றையெல்லாம் காத்திட அவைகள் வாடிப்போகும் முன்பே நீரிட்டுக் காப்பாற்றுங்கள்.
ஆலம் வித்து உயிர்சு மந்து
ஆசை யோடு அதைவ ளர்த்து
வேலை கொண்டு காப்பது போல்
காத்து பெற்று எடுக்கின்றார்
பால் என்னும் ரத்தம் தந்து
உன்னை ஒட்டி வளர்க்கின்றார்
தோல் உடம்பை காப்பது போல்
நீயும் காக்க வேண்டுமடா 32
நம் தாய், ஆலம் விதைபோன்ற நம் உயிரினைச் சுமந்து, பெற்றெடுத்து ஆசையோடு வளர்த்து, கையில் வேலைக் கொண்டுக் காக்கும் வீரனைப்போலக் காத்து, தன் பாலாகிய இரத்தத்தை நமக்கு ஊட்டி வளர்க்கின்றார். உடலைக் காக்கும் நம்முடைய தோலைப் போல நம்மைப் பெற்றவரை நாம் காத்திட வேண்டும்.
பெண்கள் நாட்டின் கண்களடா
பேணி காக்க வேணுமடா
பெண்கள் இல்லை என்றுசொன்னால்
வாழ்வில் இன்பம் இல்லையடா
மண்ணில் உயிர்கள் அன்புடனே
வாழ காரணம் அவர்தானே
எண்ணி காக்க வேணுமடா
எண்ணம் செயலும் துணைகொளடா 33
பெண்கள் நம் நாட்டின் கண்கள். அவர்களை நாம் போற்றி பாதுகாக்க வேண்டும். பெண்கள் இல்லை என்றால் நம் வாழ்வில் இன்பம் ஏதும் இல்லை. மண்ணில் உயிர்கள் அன்புடன் வாழ்வதற்கு பெண்களே காரணம். இவற்றை மனதில் நினைத்து பாதுகத்திட அவர்களைக் காத்திட வேண்டும்.
குடும்பம் தாண்டி வெளியில் உள்ளோர்
அக்கரை பச்சை யாகக் காண்பர்
குடும்பத் துள்ளே நடப்பவை எல்லாம்
வெளியில் தெரிய வாய்ப்பு இல்லை
நடப்பதெல்லாம் உறவைத் தாண்டி
பிறரிடம் மொழிதல் அழகு இல்லை
குடும்பச் சூழல் அறிந்த நாமே
தடைகள் தாண்டி வெல்ல வேண்டும். 34
நம் குடும்பத்தைச் சாராதவர்கள், நம் குடும்பச் சூழலைப் புரிந்து கொள்வதில்லை. நம்மைவிட அவர்கள் நன்றாகத்தான் இருப்பார்கள் என நினைத்துப் பொறாமைப் படுவார்கள். நம் குடும்பத்தில் நடக்கும் அத்தனையும் மற்றவருக்குத் தெரிவதில்லை. நாமாகவே, நம் குடும்பத்தில் நடப்பனவற்றை மற்றவருக்குச் சொல்லக் கூடாது. நம் குடும்பச் சூழலை அறிந்து நாமே தடைகளை வெல்ல வேண்டும்.
உள்ளம் உண்மை யாக இருந்தால்
உருக்கும் துன்பம் நிகழாது
உள்ளத் தூய்மை உடலின் தூய்மை
நோய்கள் உன்னை நெருங்காது
பிள்ளை செல்வம் பேதை நெஞ்சம்
என்றும் கலங்கி இருக்காது
பிள்ளை யாக துன்ப மறப்போம்
நாளும் மகிழ்ந்து வாழ்வோமே. 35
மனம் உண்மையாக இருந்தால், மனதை உருக்கும் துன்பங்கள் ஏதும் நிகழாது. உள்ளம் தூய்மையாக இருந்தால் உடலும் தூய்மையாக இருக்கும். எந்த நோயும் நம்மை அண்டாது. குழந்தைகளும் பேதை உள்ளம் கொண்டவரும் என்றும் கலக்கத்தில் இருக்க மாட்டார்கள். பிள்ளைகளாய் துன்பம் மறப்போம். எல்லா நாட்களும் மகிழ்ச்சியாய் வாழ்வோம்.
அடுக்கு மாடி வீடு கட்டி
அடுக்க டுக்காய் கடனை சுமந்து
துடுப்பில் லாத படகு போல
கவலைக் கடலில் மிதந்து விடாதே
இடையில் உள்ளோர் சொல்லை ஏற்று
தனது நிலையை மறந்து விடாதே
அடுப்பும் இருக்க இடமும் போதும்
ஆனந் தவாழ்க்கை வாழ்ந்தி டலாமே 36
அடுக்கடுக்காய் மாடி வீடுகள் கட்டி, அடுக்கடுக்காய் கடனைச் சுமந்து, துடுப்பு இல்லாத படகைப்போல கவலைக் கடலில் மிதக்க வேண்டாம். மற்றவர்களின் சொல்லை ஏற்று நம்முடைய நிலையை மறத்துவிடக் கூடாது. உணவு சமைக்க அடுப்பும் உண்டு உறங்க இடமும் இருந்தால் போதும் மகிழ்ச்சியான வாழ்க்கை வாழலாம்.
மனைவி ஓரிடம் கணவன் ஓரிடம்
குடும்பம் நடத்தினர் இருவரும் தனித்தனியே
தினம்தினம் படும்துன்பம் தொலைபேசி வழிசொல்லி
ஆறுதல் அடைகின்ற அன்பான குடும்பம்
மனைவி குடும்பத்தைத் திட்டமிட்டு நடத்துகிறாள்
கணவன் சம்பளத்தை உண்ணாமல் அனுப்புகிறான்
அன்புகொண்ட உள்ளத்தில் வஞ்சனைகள் ஏதுமில்லை
இளமைகள் தோற்றன அறுபதாம் திருமணம் 37
மனைவி உள்ளூரிலும் கணவன் வெளிநாட்டிலும் குடும்பம் நடத்தினர். இருவரும் தனித்தனியாக. தாங்கள் அனுபவிக்கும் துன்பங்களைத் தொலைபேசி வழியே சொல்லி ஆறுதல் அடைகின்ற அன்பான குடும்பம். மனைவி திட்டமிட்டு குடும்பத்தை நடத்துகிறாள். கணவன் சம்மாத்தியத்தை உணவுக்குக் கூட செலவு செய்யாமல் அனுப்பி வைக்கிறான். அன்பு கொண்ட உள்ளங்களில் வஞ்சனைகள் ஏதும் இல்லை. இளமைகள் தோற்றுப் போயின அவர்களது அறுபதாம் கல்யாணத்தில்.
பள்ளிக்கு அனுப்பும் பிள்ளை
பாடங்கள் படித்து அறியா
பிள்ளைக்கு சொல்வ தில்லை
பெற்றோரும் தனது வலியை
இளமைக்கு அடிமை யாகி
நட்புக்கள் பாதை செல்வர்.
வளம்குறைந்து போன பின்னே
மனம்வருந்தி பயன் என்ன? 38
பள்ளிக்கு அனுப்பி வைக்கப்படும் பிள்ளைகள் பாடத்தைப் படித்து அறிந்து கொள்வதில்லை. பெற்றோர்களும் தாங்கள் படும் துன்பங்களை தங்களின் பிள்ளைகளுக்குச் சொல்லி விளங்க வைப்பதில்லை. குழந்தைகளும் தங்களின் இளமைப் பருவத்தில் கெட்ட சகவாசத்தால் போகக் கூடாத பாதைக்குச் செல்கின்றனர். படிக்கும் காலம் கடந்து துன்பப்படும் காலத்தல் மனம் வருந்தி பயனொன்றும் இல்லை.
பெற்றோர்கள் பிள்ளைகளை பொறுப்புடன் வளர்ப்பதில்லை
உணவுஉடை தந்துவிட்டு தவறுக்கு துணைபோவார்
கற்றுதரும் ஆசான்கள் ஒழுக்கமின்மை கண்டித்தால்
பிள்ளைக்கு சாதகமாய் பள்ளிவாசல் வந்துநிற்பார்.
சுற்றியுள்ள சூழ்நிலைகள் சுழலுக்குள் இழுத்துவிட
சுழலுக்குள் மாட்டியவர் மீண்டுவர நினைப்பதில்லை
பெற்றோர்கள் இடமிருந்து செல்வங்கள் கரைசேர்க்க
ஆசான்கள் படும்பாடு சொல்லிமாள முடியாதே 39
பெற்றோர்கள் தங்கள் பிள்ளைகளைப் பொறுப்புடன் வளர்ப்பதிலை. அவர்களுக்கு உணவு, உடைகளைத் தந்துவிட்டு அவர்கள் செய்யும் தவறுகளுக்குத் துணை போகின்றார்கள். பிள்ளைகள் செய்யும் தீய ஒழுக்கங்களை ஆசிரியர்கள் கண்டித்தால், பிள்ளைகளுக்குத் துணையாக ஆசிரியர்களைக் கண்டிக்க பள்ளிக் கூடம் வந்து நிற்கின்றனர். இப்படிப்பட்ட சூழலில்தான் பிள்ளைகள், கெட்ட நண்பர்களின் செயல்களால் தவறான செயல்களைச் செய்து, அதிலிருந்து மீண்டு வர முடியாமல் தவிக்கின்றனர். பெற்றோர்கள் இடத்தில் இருந்து மாணவர்களைக் காப்பதற்கு ஆசிரியர்கள் படும் துன்பங்கள் சொல்லி மாளாது.
ஆர்வத் தோடு கல்விகற்கும்
மாண வர்கள் இன்றில்லை
தேர்ச்சி பெற்று பட்டங்கள்
பெற்ற வராலே பயனில்லை
பேருக் காக பட்டங்கள்
வாங்கி பெருமை தேடுகிறார்
தேர்வில் வெல்ல முடியாமல்
வேலை யின்றி தவிக்கின்றார். 40
இன்றைய மாணவர்கள் கல்வியை ஆர்வத்தோடு கற்பதில்லை. அப்படியே தேர்ச்சி பெற்று பட்டங்கள் பெற்றாலும் அந்தப் பட்டங்களால் அவர்களுக்குப் பயனில்லை. கல்வியை முறையாகக் கற்காமல் பேருக்காக பட்டம் வாங்கி அவர்கள் பெருமை தேடுகிறார்கள். அதன் காரணமாக, போட்டித் தேர்வுகளில் அவர்களால் வெற்றி பெற முடியாமல் வேலை வாய்ப்பு இன்றி தவிக்கின்றார்கள்.
ஆடை கட்டி உலவுகின்ற
மனித மிருகக் கூட்டங்கள்
ஆடை மட்டும் இல்லையென்றால்
நீங்கள் கூட மிருகம்தான்
கூடி இன்பம் துய்க்கின்ற
மிருகம் விரும்பி கூடுதடா
வாட்டி வதைத்து துன்புறுத்தி
விருப்பம் இன்றி துய்க்கின்றீர். 41
இனப்பெருக்கம் செய்யவும் இன்பம் அனுபவிக்கவும் ஒன்று சேருகின்ற விலங்கினங்கள் இரண்டும் விரும்பியே கூடுகின்றன. பெண்ணின் விருப்பம் இல்லாமல் அவர்களை துன்புறுத்தி உடலாலும் மனதாலும் வதைத்து இன்பம் அனுபவிப்பவர்கள் ஆடைகட்டி உலவுகின்ற மனித மிருகங்கள். ஆடை மட்டுமே அவர்களை வேறுபடுத்துகிறது.
ஓட்டுக் காக காசு வாங்கி
ஓட்டை விற்கும் மானிடரே
ஓட்டு உந்தன் கைவேல் என்று
உணர மல்நீர் இருக்கிறீர்
ஓட்டு உந்தன் நிலையை மாற்றும்
உணர்ந்து கடமை ஆற்றுவீர்
ஓட்டுக் காக ஆசை காட்டும்
மனிதர் இங்கு மாறுவார். 42
ஓட்டுக்கு பணம் வாங்கி தங்களுடைய வாக்குகளை விற்கும் மனிதர்களே. ஓட்டு உனது கைவேல். அதை ஏன் உணராமல் இருக்கின்றீர். உன்னிடம் உள்ள வாக்கு, உனது இந்த நிலைமையை மாற்றும் என்று ஏன் உங்களுக்குப் புரியவில்லை. காசு வாங்காமல் நீங்கள் வாக்களிக்கும் கடமையைச் செய்யுங்கள். ஓட்டுக்கு பணம் தருகிறோம் என்பவர் இங்கு மாறுவர். உங்கள் தேவைகளைப் பூர்த்திசெய்வர்.
கையூட்டு தந்து தந்து
காரி யங்கள் நடத்துறார்
கையூட்டு கொடுக்கல் வாங்கல்
மிகுதி யாக நடப்பதால்
கையூட்டுப் பெற்ற வர்கள்
தவறு மிகையாய் செய்கிறார்
கையூட்டு இல்லை என்றால்
நாடு மாற்றம் காணுமே 43
கையூட்டு (லஞ்சம்) கொடுத்து கொடுத்து தங்களின் காரியங்களை முடித்துக் கொள்கின்றனர். இவ்வாறு கையூட்டு கொடுக்கல் வாங்கல் என்பது தற்போது மிகுதியாக நடக்குது. இதனால் நாட்டில் தவறுகள் மிகுதியாக நடந்து கொண்டிருக்கிறது. கையூட்டுக் கொடுக்கும் வழக்கம் மாறினால் நாடும் நல்ல மாற்றங்களைக் காணும்.
சிறகுகள் இன்றி பறவை பறப்ப தில்லை
சிரிப்புகள் இன்றி வாழ்க்கை சிறப்ப தில்லை
உறவுகள் இன்றி வாழ்க்கைத் துணைகள் இல்லை
உரிமைகள் இன்றி உடன்பி றப்பும் இல்லை
திறமைகள் இன்றி பணிகள் நடப்ப தில்லை
தீமையும் நன்றும் பிறரால் வருவ தில்லை
திறம்பட கற்கா விட்டால் பெருமை இல்லை
புரிந்துநீ வாழ்வை நடத்த செழிக்கும் வாழ்வே 44
சிறகுகள் இல்லாமல் பறவைகள் பறக்க இயலாது. முகத்தில் சிரிப்பு இல்லாமல் வாழ்க்கை சிறப்பத்தில்லை. வாழ்க்கையில் உறவுகள் துணை இல்லாமல் வாழ்க்கை சிறப்படைவதில்லை. உறவுமுறை இல்லாமல் உடன்புறப்பும் இல்லை. திறமைகள் இல்லாமல் செயல் எதுவும் நடப்பதில்லை. நமக்கு வரும் தீமையும் நன்மையும் பிறரால் வருவதில்லை. திறமையுடக் கற்கவில்லை என்றால் பெருமைகள் ஏற்படுவதில்லை. இவற்றைப் புரிந்துகொண்டு வாழ்க்கை நடத்தினால் வாழ்க்கை சிறப்படையும்.
ஒளியினால் தெரியும் பார்வை
உழைப்பினால் சேரும் செல்வம்
பளிங்குகள் காட்டும் தோற்றம்
கல்வியால் உயரும் வாழ்வு
தெளிந்திடும் நீர்போல் உண்மை
தெரிந்திரும் ஒருநாள் மெய்சொல்
ப;ள்ளிகள் செம்மை யாக்கும்
பணிந்துநீ கற்பாய் நன்றே 45
ஒளி இருந்தால்தான் பார்வை நன்றாகத் தெரியும். உழைப்பவரிடம் செல்வம் வந்து சேரும். கண்ணாடி நம் தோற்றத்தைத் தெளிவாகக் காட்டும்.கல்வியால் நம் வாழ்க்கை உயரும். தெளிந்த நீர்போல் உண்மை ஓருநாள் வெளிப்படும். பொய் ஒருநாள் எல்லோர்க்கும் தெரிந்துவிடும். பள்ளிக் கூடங்களும் வகுப்பறையும் உன்னைச் செம்மைப்படுத்தும். ஆகவே, பணிவு கொண்டு நன்றாய் கற்க வேண்டும்.
கலைமகள் நாவில் வந்து
அமர்ந்திட வேண்டு மென்றால்
கல்வியை கண்ணாய் எண்ணி
பொறுப்புடன் கற்க வேண்டும.
தலைவணங் கிஆசான் சொல்லை
உயிரென மதிக்க வேண்டும்
விலையிலா கல்வி கற்று
வாழ்வினை உயர்த்த வேண்டும் 46
கலைமகள் நம் நாவில் வந்து அமர்ந்திட வேண்டுமென்றால் கல்வியை கண்ணாக நினைத்துப் பொறுப்புடன் கற்கவேண்டும. ஆசிரியர்கள் சொல்லும் சொல்லை உயிராக மதித்து, விலைமதிப்பற்ற கல்வியைக் கற்று வாழ்வினை உயர்த்த வேண்டும்.
கல்லாமல் தேர்ச்சி காணும்
நிகழ்கால சமுதா யத்தில்
கல்விதரும் கூட மெல்லாம்
பொழுதுபோக்கு இடமாய் எண்ணி
கல்வியின்மேல் பற்று இன்றி
நினைத்தபோது வந்து செல்வார்
கல்விகற்று கொடுக்கும் ஆசான்
மதியாமல் திரிகின் றாரே 47
படிக்காமல் தேர்ச்சி பெறவேண்டும் என்று நினைக்கின்ற இன்றைய மாணவர்கள், கல்வி கற்க விருப்பம் இல்லாமல் கல்விக் கூடங்கள் பொழுதுபோக்கு இடமாக நினைத்து, அவர்கள் நினைத்த நேரம் வந்து செல்கின்றனர். அவர்கள் கல்வியைக் கற்றுதரும் ஆசிரியர்களையும் மதிக்காமல் செயல்படுகின்றனர்.
கூட்டம் போட்டு ஆலோசனை செய்வார்
பல்லோர் இடத்து கருத்துகள் பெறவே
கூட்டத்தில் உள்ளோர் யாவரும் சான்றோர்
ஆயினும் சிந்தனை வெவ்வேறு ஆகும்
நாட்டு மக்கள் யாவரும் அறிவினர்
சிந்தனை வெவ்வே ராகவே இருக்கும்
தீட்டிய அறிவு செய்தொழில் பொருத்தே
யாரையும் எளிதாய் எண்ணிடம் வேண்டாம் 48
தங்களின் கருத்துகளைக் கேட்டறிய, பலரையும் கூட்டி ஆலோசனைக் கூட்டம் நடத்துகின்றனர். கூட்டத்தில் உள்ளவர்கள் சான்றோர்கள் என்றாலும் ஒவ்வொருவருக்கும் ஒவ்வொரு சிந்தனை உண்டு. நாட்டு மக்கள் அறிவினர் என்றாலும் ஒவ்வொருவருக்கும் ஒவ்வொரு கோட்பாடு, எண்ணம் தோன்றும். அது அவர் செய்யும் தொழிலின் அனுபவத்தைப் பொருத்தே. ஆதலால் யாரையும் ஏளனமாக எளிதாக நினைத்திட வேண்டாம்.
கிடைத்த உணவை கிடைத்த நேரம்
உண்டு வாழும் உயிர்கள்
படைத்த இறைவன் எல்லா உயிர்க்கும்
தேட கொடுப்பான் அவனே
கிடைத்த உணவை உண்டு மீதி
விட்டுச் செல்லும் அவைகள்
கிடைத்த உணவை மனிதர் போல
தொகுத்து வைத்தல் இலவே 49
மனிதனைத் தவிர ஏனைய உயிரினங்கள் கிடைத்த உணவை கிடைத்த நேரத்தில் உண்டு உயிர் வாழ்கின்றன. எல்லா உயிரும் உணவைத் தேட இறைவன் கொடுக்கின்றான். அவைகள் கிடைத்த உணவை உண்டு போதும் என்றதும் மீதி உணவை அங்கேயே விட்டுச் செல்கின்றன. மனிதர்கள் போல நாளைக்கு வேண்டும் என்று எடுத்து வைப்பதில்லை.
மரத்தை வெட்டலும் மனிதனை
வெட்டலும் ஒன்றே ஆகும்
மனிதன் வெட்டினால் மீண்டுமாய்
பெற்றதை வளர்ப்பார் காணீர்
மரத்தை வெட்டினால் மீண்டுமாய்
ஆக்கிட யாரும் இலையே
மரம்வாய்த் திறந்தது சொல்லா
வெட்டிட வேண்டாம் என்றே 50
மரத்தை வெட்டுவதும் மனிதனை வெட்டுவதும் ஒன்றேயாகும். மனிதனை வெட்டினால் மீண்டும் பெற்றெடுத்து வளர்ப்பார்கள். மரத்தை வெட்டினால் அதனை மீண்டும் வளர்க்க வேண்டும் என்று யாரும் நினைப்பதில்லை. மனிதனை வெட்டினால் தன்னை வெட்ட வேண்டாம் என்று சொல்வான். மரம் வாய்த்திறந்து என்னை வெட்ட வேண்டாம் என்று சொல்லுமோ?
பிள்ளை பெற்றிட ஊரே
கூடி மகிழ்ச்சி கொள்ளும்
முளைத்த மரங்கள் கண்டு
மகிழ யாரும் இல்லை
பிள்ளை வளர்ப்பின் கவனம்
செலுத்தி அக்கறை கொள்வர்
முளைத்த மரத்தை கண்டு
வளர்ப்பார் உலகில் உளரோ? 51
வீட்டில் குழந்தை பிறந்தால் அந்த ஊரே கூடி மகிழும். அதே நேரத்தில் ஒரு மரம் முளைத்தது என்றால் அதனைக் கண்டு யாரும் மகிழ்வதில்லை. பிள்ளைகளை அக்கறையும் கவனமும் கொண்டு வளர்ப்பார்கள். ஆனால் மரத்தைக் கண்டு வளர்ப்பவர்கள் இவ்வுலகில் யாரும் இல்லை.
பிள்ளை அடித்தால் வாய்தி
றந்து பிறர்பால் சொல்லும்
வளரும் மரங்கள் நேரும்
துன்பம் யார்பால் சொல்லும்
பிள்ளை உணவை அழுது
கேட்டு உண்டு மகிழும்
விளைவைக் கொடுக்கும் மரங்கள்
உணவை யாரைக் கேட்கும் 52
குழந்தையை அடித்தால் அது வாய்திறந்து பிறரிடம் போய் சொல்லும். மரங்களுக்கு நேரும் துன்பத்தை அவை யாரிடம் போய் சொல்லும். குழந்தை அழுது உணவைக் கேட்டு உண்டு மகிழும். நமக்குப் பலன்தரும் மரங்கள் எல்லாம் யாரிடம் சென்று உணவைக் கேட்கும்.
பறவை விலங்கு பூச்சி என்று
உணவு தண்ணீர் தேடி உண்ணும்
வறுமை உற்ற போதும் இவைகள்
வேறு இடத்தில் சென்று வாழும்
சிறந்த மரமும் செடியும் கொடியும்
உணவும் நீரும் எங்கு தேடும்
உறவாம் மண்ணை விட்டு எந்த
இடத்தில் சென்று அவைகள் வாழும் 53
பறவை, விலங்கு, பூச்சிகள் எல்லாம் ஓரிடத்தில் இருந்து வேறு இடம் செல்லும் இயல்பு கொண்டவை. இவைகள் எல்லாம் உணவு இருக்கும் இடமும் தண்ணீர் இருக்கும் இடமும் தேடிச் சென்று உண்ணும். தனக்குத் தேவையான உணவும் தண்ணீரும் அந்த இடத்தில் இல்லாதபோது, அவைகள் உணவும் நீரும் இருக்கும் வேறு இடம் சென்று வாழத் தொடங்கிவிடும். சிறப்பு மிகுந்த மரம், செடி, கொடி எல்லாம் உணவும் நீரும் கிடைக்காதபோது எங்கே சென்று தேடும். தனது உறவான மண்ணை விட்டு வேறு எங்கு சென்று வாழும்.
தாய்மடி மீது தலைவைத்து
வேதனை பகிர்ந்து கொள்ளுங்கள்
நோய்நொடி மருந்து ஆறுதல்கள்
சொல்லி நம்மை தேற்றிடுவார்
தாய்மகள் மனைவி உடன்இருந்து
தனது அன்பைப் பொழிந்திடுங்கள்
சேயுடன் பொழுதைக் கழித்திடுங்கள்
சோர்வுகள் இன்றி வாழ்ந்திடுங்கள் 54
பெற்றெடுத்த தன் அன்னையின் மடியில் தலைவைத்துக் கொண்டு, உங்களின் துன்பங்களை அவரிடம் பகிர்ந்து கொள்ளுங்கள். நமக்கு வரும் நோய்களுக்கு ஆறுதல் என்னும் மருந்து தந்து நம்மைத் தேற்றிடுவாள். பெற்ற தாயோடும் இரண்டாம் தாயான மகளோடும் மனைவியோடும் உடன் இருந்து தனது அன்பைப் பகிர்ந்து கொள்ளுங்கள். குழந்தைகளுடன் மகிழ்ந்து குலாவி பொழுது போக்குங்கள். உங்கள் உடல் மற்றும் மனச் சோர்வுகள் நீங்கி வாழுங்கள்.
வாழும் போது ஒருவர் நன்மை பேசாது
மாண்ட பின்பு அவரின் தீமை பேசாது
வாழும் மனிதன் தவறைத் திருத்த முயலாது
நன்மை செய்யக் கண்டு அதனைத் தொடராது
ஏழ்மை போக்கி உண்ண துணைபுரி யாது
எளிய மனிதன் செயலை கண்டு கொள்ளாது
தாழ்வு கண்டு அவரை ஏற்றி விடாது
தவிக்கும் நிலையில் கூட துன்பம் தீர்க்காது 55
மெள்ள அரும்பி விரைந்து பருத்து
பணியா திமிராய் வானம் பார்த்து
துள்ளி அசைந்து காண்போர் நெஞ்சை
சுண்டி இழுத்த வனத்த மார்பு
பள்ளம் நோக்கி வளைந்து தளர்ந்து
வற்றும் போதும் கொண்டான் நெஞ்சம்
தள்ளி போக திருக்க வேண்டும்
முதல்நாள் போல மணக்க வேண்டும் 56
இருக்கும் நாளை மகிழ்ச்சியாக்கி
இன்பம் கண்டு வாழ்ந்திடுவீர்
விருப்பு வெறுப்பு எதுவுமின்றி
உறவில் கூடி மகிழ்ந்திடுவீர்
வருந்தி வாழ்வை ஓட்டுவதனால்
வருத்தம் குறைந்து போவதில்லை
நெருங்கி சுற்றம் கூடிவாழ்ந்தால்
வருத்தம் விலகி மகிழ்ச்சிபொங்கும் 57
